Luis Schenk, atlet dl Atletica Gherdeina Raiffeisen vënc l titul de Campion Talian tla categuria SM 35 ti 800 metri a Ancona

Do che l’atlet de Gherdëina se ova bele l’ann passà davanià n titul naziunel y ova nce pudù fé pea a Madeira tl Portugal pra i campiunac europeics de atletica lesiera tla categuria SM 35, se ovel nstadì y plu  avisa n dumënia ai 08. de merz, scrit ite a Ancona pra la garejedes che valova per l titul naziunel indoor 2026. Luis Schenk ova ti ani passei fat pea pra truepa maratones les fajan feter dutes chëles plu mpurtantes che mpue sëura dut l mond. Da doi ani ncà se ovel metù tl cë de ulëi scumencé a fé i 800 metri, na discilina dldut autramënter che se dumanda nce n autra sort de alenamënc y preparazion. Do che n ova laurà cun l’atlet sun la tecnica de sauté cialan de miuré la posizion dl corp y i muvimënc dla giames se oven riesc ntendù che i 800 metri ëssa pudù vester na distanza nteressanta per ël. Defati ti fovela bele garateda de arjonjer de boniscimi resultac tl 2025 ruvan a se davanië l Titul Naziunel outdoor. 

Chëst‘ iede alincontra se tratovela de se bater per l titul indoor, chël uel di te na gran palestra dedite. Tlo ie la pista plu curta, mé de 200 metri, canche dedora iela de 400. Nsci muessa i atlec sauté cater iedesc ntëur al anel. Nce sce cun i alenamënc ne fovel mo nia tan anjenià, ti iela purmpò garateda a Luis na garejeda straordinèra, tant che l ne n’ie nia da crëier coche l ie stat bon de se zaré ca a Ancona l titul de Campion Talian 2026 di 800 metri indoor. Do che l’atlet de Gherdëina ova fat na garejeda taticamënter perfeta se pusizionan do la prima raida inant dossù al aversèr che sautova danora, spiculovel avisa sun l drë mumënt ulache l pudova l ataché y l pië. A feter 50 metri dan l traviert à pona Luis slungià la giama aumentan l ritm y sautan ala per cun Jean Paul Sambou dla Libertas Atletica Forlì. Iust tl mumënt ulache l ti ie jit dant ie depona Schenk ciumpedà, ma se smacan mo ite coche reazion tl traviert a na maniera spetaculera iel stat bon de fermé per prim l’ëura. L titul ie unì arjont cun n tëmp de 2:00:92, l segondo post ti ie jit a Jean Paul Sambou cun l tëmp de 2:00:97 y la bedaia de bront à giatà Proietti Romolo Fabio dl Atletica Winner Foligno do che l ie sautà i 800 metri te 2:01:86. Nsci nes à Luis purtà te Gherdëina na bela bedaia d’or vencian cun merit l titul de Campion Talian 2026. Inant jirala a Toruń tla Polonia dai 27.03 – 02.04.2026 cun la garejeda che vela per l Titul Europeich indoor 2026 for per la categuria SM 35.

Per chësta nueva ndesfideda ti augurons dut l bon, ma dantaldut che l ebe inant truepa legrëzes y sodisfazions a pratiché l’atletica lesiera.

Per l’Atletica Gherdëina Raiffeisen
Stefan Planker