Alessia Goffi: Bedaia de bront pra i campiunac de atletica lesiera Indoor a Padova

08. Mar 2021

Miec ne pudova la sajon dl'Atletica Gherdëina Raiffaisen nia scumencé. Ai 21 de fauré 2021 garejea Alessia Goffi, la portaculëures de nosta lia, pra n meeting tla proves multiples y ruva segonda. La se tratova de na manifestazion sportiva cun la partezipazion de atletes da dut l nord dla Talia y dassova vester dantaldut na prova generela per I campionac Talians indoor che fova pona sun l program ai 06 y 07 de merz 2021. L gran resultat fova bele de marueia, ajache, nce sce Alessia se ova venciù l titul naziunel d'autonn dl 2020, muessela chëst'ann garejé te na categuria plu auta y cun atletes plu vedles respet a d'ëila, ma dantaldut sënza n drë alenamënt. Degun saut lonch sun na pista de atletica ne pudovela te chisc prim mënsc dl ann purvé ora, degun saut aut cun I ciauzei da broces ne n'ovela mo chest'ann tla giames, deguna distanza sun I 60 metri cun rëmes ne pudovela sauté. La pista tlo da nëus ie mo da nëif y l mesum de pudëi se alené a Lana coche n pudova mo fé te chisc ultimi ani, fova ënghe per rejons dl virus corona nia mesum de meter a jè. Mbën, mé l training te palestra cun destanzes limitedes, cun cundizions nia dldut ideeles purtova pro a ne lascé nia speré n resultat de marueia a livel naziunel y cun duta la mieures dla categuria U18 che fajova pea.

Pra la garejedes indoor fejun, te chësta categuria, 5 garejedes. N sauta I 60 metri cun rëmes, n fej l saut aut, l saut lonch, n smaca pëis y n sauta I 800 metri. Respet ai campiunac outdoor, mancia te palestra l smaché la lanza, disciplina che l ne n'ie sambën nia mesum pratiché, y pra l sprint cun I rëmes sauten 60 metri mpede 100 metri.

Granda ie stata daviadechël la sensazion a udëi l resultat finel da pert de Alessia Goffi de Urtijëi tl pentatlon indoor U18 dla mutans pra I campiuonac talians ulache la se tratova propi dl titul naziunel. Nce sce cun la mancianza de n training fat sun la pista, se ala batù dastramp bën, miuran te 4 sun 5 disciplines si prestazions persuneles. Nce sce n sperova n resultat danter la primes 5, ne n'oven nianca dalonc pensà a n podest. Unida iela autramënter. L training da l'ann passà à mo fat na gran fazion y l'à purteda a se davanië la bedaia de bront. Nsci ie sautei ora i reultac: 60 metri cun rëmes: 9,50; saut aut: 1,59; smaché l pëis: 10,98; saut lonch: 5,32 (mé tl saut lonch ne n'ala nia miurà si record persunel); 800 mnetri: 2,36,70. De ndut à Alessia arjont 3384 ponc do Carboncini Matilde dl atletica Empoli (campiunëssa taliana indoor cun 3477 ponc) y Iemma Matilde dl Atl. Rieti (vizecampiunëssa taliana cun 3401 ponc).

Al trainadëur Walter Kostner y a Alessia Goffi ti fajons de gran cumplimënc per avëi arjont chisc resltac y per avëi sapù da gestè I alenamënc te cundizions che ne fova dldut nia ideeles.