Record provinziel tla smaché la lanza da pert de Chiara Goffi

N sada iel unides metudes a jè la prima garejedes de atletica lesiera de chëst'ann. Dal mumënt che nce la garejedes de atletica lesiera ie da meter a jè cun mesures de segurëza plutosc stersces per via dl covid 19, iel mpermò sën unides a s'l dé la prima cumpetizions de chëst'ann y ntant mé per la majera categuries. Garejà iel unè nstadè a Bulsan te cundizions de tëmp nia massa adatedes ai atlec y ala atletes, purmpò ne se à nosc atlec y atletes nia lascià sciautrè. Defati bel riesc pra la prima garejeda iel sautà ora n record provinziel per l'Atletica Gherdëina Raiffeisen nce sce ntan la garejeda ovel scumencià a pluëi y l tëmp scumenciova a deventé for plu y plu braus. Chiara Goffi, te si disciplina plu bënuluda y plu avisa tl smaché la lanza, ie stata bona de se fé valëi pra duta la concurënza tla categuria U18 smacan la lanza bën 42,64 metri lonc. La lanza per chësta categuria à n pëis de 500 gram. L record batù ie stat chël de n autra atleta de Gherdëina che fova unè fat tl 2012 da Stefanie Messner. Messner ova scumencià si cariera da atleta cun nosta lia, ma plu tert fajovela i alenamënt y garejova per na lia de Personen. Messner ova arjont na mesura de 39,55 m. La mesura de Chiara ie defin mpurtanta ajache nsci, bele pra la prima garejeda, ala arjont l lim per pudëi fé pea pra I campiunac talians. L lim scrit dant ie de 33 m., belau 10 m demanco de cie che l ne n'ie unè arjont da Chiara

Nce si sor Alessia ie zapeda doi iedesc sun l scialir plu aut dl podest: Alessia, che à garejà tla categuria dla cadetes à fat si record persunel sibes tl saut lonch, cun na mesura de 5,21, che nce ti 80 metri cun rëmes. Chësta distanza ie unida fata dala jëuna de Urtijëi te 12,99 secunc. Na bedaia d'arjënt ti ie nce jita a Sabrina Ploner tla medema categuria tl smaché l pëis cun na mesura de 7.04.

Fat pea pra la garejedes à nce Tomasini Jana tla categuria assoluta dl ëiles (8. post ti 100 metri cun 13,81 secunc y n 5. post 200 m cun 29,30 secunc), Luis Schenk tla categuria assoluta (4. post ti 400 m cun n tëmp de 54,84) y Maria Frontul tla categuria cadetes (9. post ti 80 m te 12,43 y 4. post tl smaché l pëis cun 6,69 m).

Do chësc bon scumenciamënt sperons nce che nosc atlec y nosta atletes posse se alené inant regulamënter y che l garate na bona sajon agonistica.

Per l'Atletica Gherdëina Raiffeisen

Stefan Planker