Campiunac talians de atletica lesiera per bën trëi atletes de Gherdëina

22. Sep 2020

Un di majeri fins dl per la sajon dl'atletica lesiera ie chël de se davanië la rejon de pudëi fè pea pra i campiunac talians. Nstadì ons bele abù l mesum de pudëi scrì vel rissa sun la partezipazion de Chiara Goffi, ma ntant nes ie unida la comunicazion ufiziela dala Fidal che mo d'autra mutans ie cualifichedes y possa nsci garejè a livel naziunel. La se trata de Alessia Goffi, sor de Chiara, Sabrina Ploner y Jenegger Selina. Garejè posseles nsci: Alessia tla proves multiples, Sabrina tl smachè la lanza y Selina tl smachè l disch. Garejà uniral dai 02 ai 04 de utober 2020 a Forlì.

Da auzè ora particularmënter ie la garejedes dla proves multiples che fova mo nstadì sun l program a Borgo Valsugana ai 19 y 20 de setëmber 2020. La garejeda fova a livel regiunel ulache l à fat pea la mieures dl Trentino - Südtirol. Tlo univel garejà tl penthalon dla categuria dla sculees A. Pra la proves multiples muessen fè 5 garejedes te doi dis y plu avisa sautè i 80 m cun rëmes, garejè tl saut aut, garejè tl saut lonch, smachè la lanza y ala fin di doi dis mo sautè i 600 metri. Fat pea a sambën Alessia Goffi, ajache la possa mustrè su de avëi danter la mieura prestazions dla Talia, ma nce Sabrina Ploner. Dassënn butà ti ala a tramedoves la atletes: Goffi ie ruveda prima cun bën 4137 ponc destacan la segonda, Galvagnini Sofia dla Lagarina Crus Team, de bën 446 ponc. Al terzo post iel da udëi Somadossi Maria Vittor dl G.S.Trilacum cun 3351 ponc. Ploner Sabrina ie ruveda al sesto post cun 2555 ponc. Nsci i resultac garejeda per garejeda scumencian pra i 80 m cun rëmes: Alessia 12,73, Sabrina 14,84; tl saut aut: Alessia 1,50, Sabrina 1,38; tl saut lonch Alessia 5,35 y Sabrina 4,15; tl smachè la lanza Alessia 36,40 y Sabrina 23,98; pra l sautè i 600 metri: Alessia 1,47,43 y Sabrina 2,10 24.

A duta nosta atletes y al trainadëur Walter Kostner ti augurons dut l bon pra i campiunac talians che unirà fac te n ena, coche dit a Forlì.

Per l'Atletica Gherdëina Raiffeisen
Stefan Planker