Alassia Goffi: Campiunëssa taliana de atletica lesiera tla proves multiples

05. Oct 2020

No mè granda, ma grandisciscima ie stata l'emozion n dumënia ai 4 de utober ntëur mesa la un domesdi canche la se tratova de se bater per la bedaia d'or a Forlì tl Emilia Romagna, na bedaia che valova per l titul talian tla proves multiples de atletica lesiera y canche n ova udù che l travert per chël che n ova laurà dut l'ann fova dan man. Puec menuc do fovel segur: l titul talian ruva chëst'ann te Gherdëina, ma jon damprovia.

Dai 3 ai 4 de utober iel unì fac a Forlì i campiunac talians de atletica lesiera per la categuria di U16. Pra chisc campiunac possa fè pea danieura l mieur o la mieura atleta te uni disciplina y per region. Per l Trentin-Südtirol vëniel fates doi grupes desferëntes, una per la Provinzia de Bulsan y una per chëla de Trënt. Per duta l'autra regions ne vën la provinzies nia tëutes n cunsciderazion. Defati vëniel nce garejà a scuadres y la scuadres ie regiuneles.

Pra chisc campiunac vëniel crì ora dal trainadëur l miëur resultat arjont da uni un nchin a chël mumënt. Chiche possa demustrè de avëi la mieura prestazion dl ann te na disciplina possa fè pea pra i campiunac te chëla garejeda.

Per l'Atletica Gherdëina Raiffeisen ova doi atletes da pudëi mustrè su de vester danter la miëures dla provinzia: Alessia Goffi tl pentathlon y Selina Jenegger tl smachè l disch. Alessia ëssa nchinamei pudù garejè te mo d'autra disciplines, ma sambën se ala cunzentrà tl pentathlon ulache la ie plu sterscia.

L pentatholon ie na disciplina che vën fata tla categuria U16. Pra i granc fejun a livel feminin l eptathlon chël uel di 7 disciplnes y pra i ëi l decathlon (10 garejedes) te doi dis. Pra uni resultat giatun ponc aldò de na tabela metuda dant. Ala fin chiche à plu ponc vënc la proves multiples.

Pra i U 16 se tratovela donca de fè 5 disciplines nsci spartides su: l prim di sautè i 80 metri cun i rëmes, l saut aut y smachè la lanza; l segondo di l saut lonch y sautè i 600 metri.

Bele tla prima garejeda ie l'atleta de Gherdëina stata bona de davanië vel pont sun la concurënta Annaliesa Pastore dl Piemonte che sun la cherta ova 2 ponc deplù de nosta atleta. Cun n tëmp de 12,64 iela ruveda terza y à giatà 885 ponc, canche la piemonteja ne n'à giatà 862. Pra l saut aut ie Alessia stata bona nchinamei de miurè si prestazion persunela arjujan n'autëza de 1,56 m demustran de vester la mieura de dutes danter la pentatletes. De ndut iel tlo sautei ora 861 ponc. La Pastore se fërma a 1,50 y giata 803 ponc. Mo dassëira messova la mutans smachè la lanza. Tlo se tratovela plu o manco de dut o nia, ajache si concurënta ie te chësta disciplina dastramp sterscia y uni meter uel dì truepiscimi ponc. Nce tlo à nosta atleta fat n record persunel smacan la lanza bën 38,31 metri lonc. Si concurënta ie tlo stata bona de trè bën 42,44 metri ti passan nsci dant a Goffi tla tlassifica provvisoria de 19 ponc. L di do, n dumënia messoveles fè l saut lonch, na disciplina ulache la portaculëures dl Atletica Gherdëina Raiffeisen ie plutosc sterscia. Tlo à dessegur nce juegà mpue l'emozion pra tramedoves la concurëntes che sentiva de pudëi se vëncer l titul o nce sl trè via. Per l'autra atletes ne fovel tan che nia plu mesun recuperè i ponc perdui nchin sën. Sibes Goffi che Pastore ie sautedes plutosc melamënter ti prim doi sauc. Pastore fova danora cun 2 cm. Pra l terzo saut alincontra se destaca Alessia mpue miec y la mesura arjonta vën mesureda a 5,17, che ti à purtà 872 ponc, canche la concurënta resta a 4,99 y giata 811 ponc. Chisc ponc la porta danora de 42 lunghëzes, ma la garejeda ne fova mo nia fineda. La mutans messova mo suatè i 600 metri. Tlo se tratovela de ne se lascè nia mucè danora si aversera y ti ste dossù. Bele do 200 metri ie Alessia nchinamei jita danora, canche do i 550 metri slongia la piemonteja de n vagun var. Cun n var segur reagësc nce Alessia ti stajan n iede dossù y pona ti ultimi 50 - 60 metri ti vala dant y stluj ju la garejeda cun n tëmp de 1,43,73. Cun chësta garejeda iel sautà ora l terzo record persunel. La Pastore ie sauteda la destanza de 600 metri te 1,45,09. Cun si arteniënza y de gra a n alenamënt costant nce sfadieus venc Alessia Goffi l titul naziunel de proves multiples U16 per l'ann 2020 y à pudù pië do nsci la bedaia d'or. Cun 4286 àla nce fat l record Provinziel che fova dant de 4177 ponc. L'atleta Annalisa Pastore ie ruveda segonda cun 4209 ponc, canche la terza, Sofia Bonaffè dl Emilia Romagna à abinà adum 3777 ponc. Tl campionat a scuadres ie l team de Südtirol ruvà al 11 esm post pra la mutans y al 14.esm post pra i mutons.

Nia da desmincë ie nce ala fin la prestazion de Selina Jenegger tl smachè l disch. Selina ie stata bona de miurè si prestazion persunela smacan l taier bën 23,02 metri lonc ruvan al 14. esm post. Nce per ëila iel stata na bona prestazion y na bele esperienza pudëi jì pea cun la rapresentativa. N gran cumplimënt ti va al trainadëur Walter Kostner che se da ju cun gra pascion per chësc bel sport purtan nosta atletes y nosc atlec danieura a fè de gran resultac.y a n livel defin aut.

Per l'Atletica Gherdëina Raiffeisen
Stefan Planker