I mutons y la mutans dl Atletica Ghërdëina Cassa Raiffeisen de Sëlva á inó arjont boniscimi plazamenc pra i campiunac provinziei de atletica lesiera de chest ultimo fin dl ena a Bulsan.
De ndut iel stat 19 lies che á partecipá a chesta garejedes y l Atletica Ghërdëina ie ruveda al cuarto post tla classifica che reverda la bedaies, den dut nen fovel 17.
Bën ot tituli provinziei, cin vizecampions y cater bedaies de bront iel sautá ora.
Runggaldier Martin – Verginer Alex y Lambacher Romy á arjont DOI iedesc l titul provinziel: Runggaldier Martin á arjont l titul ti 1000 m cun l tëmp de 2:48,35 y ti 2000 m (6:34,26) - Verginer Alex tl saut tripl sautan 11,99 m y tl saut lonch sautan bën 5,85 m y Romy Lambacher tl smaché l disc (26,52 m ) y tl smaché l peis (8,52m). Yvonne Senoner á arjont n bel prim post tl smaché la lanza (27,61 m ) y ie vizecampuinëssa tl saut lonch, sautan ben 5,40 m batan si record personel, l manciova me 2 cm a ruvé prima.
Demetz Silvia ie stata bona de arjonjer l titul tl saut aut, sautan 1,40 m, che ie na boniscima auteza sce n pensa che la ie mo tla categuria B dl ann 97/98, tla medema categuria y tla medema disciplina á Cortoni Elena arjont l titul de vizecampiunëssa sautan 1,34.
L titul de vizecampiunëssa ti ie enghe jit a Messner Stefanie tl saut aut sautan 1,47 m a Insam Alessandra tl smaché l peis trajan 8,77 m y a Schenk Anna ti 400m cun l temp de 1:04,86.
Silvia Spisser á arjont doi bedaies de bront, una ti 80 m sprint cun l tëmp de 10,97 y ti 80 metri cun rëms (13,58). Bedaia de bront ti ie enghe mo jita a Insam Verena tl saut tripl, eila ie sauteda 9,19 m y a Mussner Jasmin tl smaché l vortex trajan 34,01 m.
Cumplimenc a duc i atlec y atletes.