ASV Atletica Gherdëina Raiffeisen ASD
ASV Atletica Gherdëina Raiffeisen ASD
ASV Atletica Gherdëina Raiffeisen ASD

News

08. May
2019

Bën diesc bedaies pra i campionac provinziei de atletica lesiera per l'Atletica Gherdëina Raiffeisen

Sun l program de atletica lesiera fovel chësc ultim fin dl ena ai 04 y 05 de mei i Campionac Provinziei assoluc de atletica lesiera. Garejà iel unì a Persenon. De ndut iel unì dat ora bën 51 titui danter la cetaguria di sculeies y sculees A y B de Südtirol. Nce nosta lia se à presentà cun treup atlec   y atletes ënghe sce l fova n di plutosc de bur tëmp cun dantaldut n gran vënt y frëit. Nce sce la cundizions ne fova nia adatedes per garejé, ne se à nosta atletes nia lascià sciautrì: bën 10 bedaies ie la sportives de Gherdëina states bones de purté a cësa, cun trëi iedesc or, doi iedesc arjënt y  cin iedesc bront. N gran plajëi fejel sambën nce a udëi che i resultac ie garatei te truepa disciplines desferëntes, sibes te chëles asveltes che nce tla longes, ti sauc, ma nce tl smaché la massaries, tant da pudëi di che la preparazion de nosta atletes fova cumpleta te feter uni disciplina.

Sun l podest ie zapeda su doi  iedesc Ploner Sabrina, Goffi Alessia, Tomasini Jana y Pitscheider Saphira. Ploner à venciù la garejeda tl smaché l pëis, cun na mesura de 7,58 secunc y à arjont n terzo post  ti 60 metri sprint (9,05);  Gofffi alincontra  à purtà a cësa na bedaia d'or ti 300 metri cun rëmes sautan la distanza te 49,12 secunc y na bedaia d'arjënt tl saut lonch cun na mesura de 4,93 m; Tomasini ie stata la mieura ti 300 metri sprint cun l tëmp de 44,58 secunc y danter la plu asveltes dla provinzia ti 80 metri sprint arjunjan la bedaia de bront do che la ie sauteda  la curta distanza tl tëmp de 10,85. Pitscheider che garejea per l prim ann tla categuria B ie stata bona de se fé valëi ala per cun la concurënza  pra l smaché la codla, na disciplina propedeutica al smaché la lanza. Cun la mesura de 27,51 ala pudù pie do ala fin la bedaia da vize campunëssa provinziela. La segonda bedaia de Sphira ti ie garateda  cun la cumpanies tla stafëta svedeja. Pra chësta stafëta sauten i 100, 200,300, y 400 metri. L' Atletica Gherdëina Raiffeisen ie stata bona de arjonjer la bedaia  cun Saphira,  Demetz Nina, Frontull Maria, y Karbon Ilaria. La mutans ie sautedes la stafëta svedeja te 2,58,41 menuc.

L rest dla bedaies de bront  ti ie jites a Alice Karbon ti 80 metri cun rëmes (14,26) y a Demetz Sofia ti 1000 metri cun n tëmp de 3,29.

Tl contest de chësta garejedes iel nce unì garjà da atlec de categuries plu autes, ma chisc resultac ne valova nia per l titul provinziel ma fova dldut ntessanc per arjonjer l lim de fé pea pra i campionac talians. Defati ie propi Hanna Insam de Sëlva che ie stata bona tl saut aut de arjonjer l lim y puderà nsci garejé a livel naziunel do che la ie sauteda tl saut aut bën 1,59 metri sëura la stangia ora.

N gran cumplimënt ti fajons a duta chësta mutans per i biei resultac arjonc, ma sambën nce  ai trainadëures (Walter Kostner, Denise Delladio y Linda Perathoner) per l bon lëur fat,  savan da motivé for inò cun i drë cunsëies duta la mutans.

Per l'Atletica Gherdëina Raiffeisen
Stefan Planker

09. Apr
2019

Piei via cun l dë pe: L’Atletica Gherdëina lascia n bon sëni bel pra l prim di de campionat.

L campionat de atletica lesiera per la categuries A y B ie pià via. Nstadì; ai 6 de auril fovel sun l program la prima garejedes ufizieles de atletica lesiera per la sajon 2019, y coche la proves ti meetings ududes de merz nes ova bele demustrà, iel per l’Atletica Gherdëina Raiffeisen sautei ora de bon resultac y de n aut livel pra na concurënza dastramp auta. Defati fovel pra truepa garejedes nchin a 60 atletes scrites ite.
Garejà iel unì a Lana te cundizions de tëmp nia dl dut ideeles, ajache l fova plutosc frëit y n gran vënt, purmpò ne se à nosta atletes nia lascià sciautrì. Pra l Grand Prix fej uni atlet y atleta 3 garejedes. Pra uni garejeda giatun ponc y cumpedan adum chisc ponc sautel ora la posizion de tlassifica. Publicon tlo i resultac dla prima diesc posizions de tlassifica.
Alessia Goffi ie stata bona de ruvé sun l podest te duta trëi garejedes, vencian i 300 m cun rëmes cun l boniscimo tëmp de 48,67. Sun l podest iela ruveda nce tl saut y plu avisa al segondo post cun la mesura de 1,49 y segonda tl smaché l disch cun 20,31 metri. Alessia ie nsci al mumënt al prim post de tlassifica generela. Tla medema categuria ti iel garatedes de bona prestazions nce a Jana Tomasini. Jana ie da udëi al terzo post ti 80 metri sprint cun n boniscimo tëmp de 11,4. Pra chësta garejeda fovel na concurënza dastramp auta, tant che l ova fat pea 58 atletes; terza iela nce tl smaché l disch cun 19,92 y sesta tl saut aut cun na mesura de 1,46.
Nce pra la mëndra categuria iel da udëi ora de bona prestazions, nce sce nosta atletes à scumencià mpermò da puech cun i alenamënc y ne n’ie dessegur mo nia dldut anjeniedes ca. Nsci ie l resultat de Sabrina Ploner ti 60 metri sprint dessegur scialdi nteressant. Sabrina ie ruveda al setimo post de 60 atletes che à fat pea. Ploner à n tëmp de 9,28, ma nia dalonc dal terzo post che fova de 9,20. N sesto post ie Sabrina stata bona de fé nce tl smaché l pëis. Si mesura ie stata de 7,45.
Inant jirala chëst’ena che vën a Bulsan cun l segondo Grand Prix

Per l’Atletica Gherdëina Raiffeisen
Stefan Planker

25. Mar
2019

De biei resultac pra l meeting de atletica lesiera a Minca

La drëta sajon per i atlec y atletes dl atletica Gherdëina Cassa Raiffeisen ne n’à mo nia scumencià, purmpò fej nosta lia pea a n valgun meetings nce bel sën a per ruvé ite inó  tla garejedes y coche test per udëi tan inant che n ie per la preparazion. Bele vel garejeda te palestra a Urtijëi ova demustrà che n ie do la rata a n bon pont, ma sambën che se paradlé pra l meetig ulache l ie feter 1000 danter atlec y atletes che fej pea ie n autra cossa.
Pra l Linden Sportfest 2019 a Minca, che chëst an nie unì metù a jì ai 10 de merz per l 43esm iede, à fat pea te deplu categuries y gerejedes desferëntes 10 atlec de Gherdëina, acumpaniei dal trainadëur Walter Kostner.
L ie stata na bela ucajion per ruvé ite inò tla carejedes, ma nce de sté doi dis deberieda ulache n à pudù mparé a se cunëscer miec ma dantaldut na oportunità per l trainadëur che à pudù udëi ulache l ie l potenzial da miuré la prestazions, nce sce la prestazions ie states sëura la aspitedes ora.
Publicon tlo i resultac di atlec che à arjont i primes 5 posc‘ dla tlassifica.
Na bela sodisfazion à pudù se to Alessia Goffi tla ceteguria U14 tl saut aut. Alessia à pudù pië do la bedaia d’or dò che la ie sauteda 1,53 metri tl saut aut. Ëila ie nce ruveda al 5. post tl saut lonch cun na mesura de 4,78 m. Nce Hannah Insam de Sëlva ti l’à fata ca a vëncer la garejeda tl saut aut. Hannah garejea tla categuria U 18 y ie stata bona de sautè 1,56 m sëura la stangia ora batan nsci duta la concurënza. Tl sauté i 60 metri cun rëmes àla arjont alincontra l bon 4.post sauta la destanza te 9,73, ma a mé 9 centesims dala prima tlassificheda.
Doi segondi posc‘ie garatei tramedoi tla categuria U 18: un ti ie jit a Candelori Maria tl sauté i 60 metri cun rëmes, (cun l tëmp de 9,65) che per mé un n centesm ne n’iela nia ruveda prima y l’auter a Goffi Chiara tl smaché l pëis. Chiara à arjont la mesura de 10,99 tla categuria U 18.
Fat pea à nce Daiane Windegger, Alice Karbon, Ines Moroder, Tomasini Jana, Samuel Demetz ora dla concurënza Anna Schenk. Duc chisc atlec y atletes ie ruvei ti primes 10 dla tlassifica, demustran bel sën de vester anjeniei a fé pea pra la garejedes dl campionat de atletica che scumencerà pona d’auril.
N gran cumplimënt ti va a Walter Kostner y a duta la trainadëures che lëura bele cun i mëndri da pitli nsu per ti dé la legrëza de pratiché l’atletica.

Per l’Atletica Gherdëina
Stefan Planker  

07. Dec
2018

Stefan Planker a cë de una dla majera lies sportives de Gherdëina: l Atletica Gherdëina Raiffeisen

Chëst’ann ie stat per l’Atletica Gherdëina Raiffeisen n ann particuler dal pont de ududa di resultac per la lia: bën doi iedesc ie Alexander Demetz ruvà sun l podest pra i campionac talians assoluc tla proves multiples. L titul de vize campion àl arjont a Padova de jené 2018 tl eptathlon indoor y la bedaia de bront ie sauteda ora a Pescara de setëmber tl decathlon, demustran de vester un di mieur atlec talians assoluc. Chisc resultac, deberieda cun trueps d’autri danter titui provinziei, regiunei y Grand Prix ti à dat a dut l team na gran sodisfazion, legrëza y ueia de fé inant. La lia dl Atletica Gherdëina Raiffeisen fova unida metuda su tl 1992 y ie da ann a ann cresciuda. Cun truep apasciunei y ulenteres che juda a alené y urganisé duta l’ativiteies, tol la lia pert a truepa manifestazions y garejedes a uni livel mescedan pea n cont di resultac no me a livel provinziel o regiunel, ma nce naziunel.

Da d’autonn fovela inò tan inant, la se tratova per la lia de lité n cunsëi nuef. Pra la senteda generela iel unìi auzei ora i aspec y l’andamënt positiv dl l’Atletica Gherdëina Raiffeisen. Dldut plajëi ti à dat al vedl cunsëi l fat che pra la nueva veles fovel inò truepes che se à metù a disposizion per lauré pea, nsci che l ie nce unì auzà l numer da 7 a 9 di rapresentanc te cunsëi. La lia ie al didancuei una dla majera lies dal sport te Gherdëina n cont de scric ite y cun si doi sezions, da una na pert dl atletica y dal’autra dla ginastica artistica, cumpëida la lia bën passa 200 scric ite.

Dat ju si nceria alincontra à l presidënt Siegfried Runggaldier che per sies ani ie stat a cë dla lia. Na gran lauda ti va a Ruggaldier per si gran lëur y mpëni che l’à fat te si doi legislatures. Siegfried Runggaldier fova bele zapà ite tla lia tl 1995 y da ilò incà fovel stat per truep ani tl cunsëi, pona per n struf coche revisëur di conc y ala fin mo per bën sies ani presidënt. Zapei ora ie nce Roland Perathoner y Ivonne Senoner, nce ëi ie stac per sies ani tl cunsëi y ne ciafieia nia plu per rejons persuneles a  se mëter inant a disposizion, ma che à purmpò mpermetù de judé pea sce la jissa debujën n ucajion de vel manifestazion sportiva.

Tl cunsëi che manejerà la lia dal 2019-2021 iel unì lità coche presidënt Planker Stefan. Planker ie dal 1994 pra l’Atletica lesiera y ie stat per 15 ani trainadëur. Ël ova scumencià a fé cun si atlec la prima garejedes sun pista y alenova da ilo inant nce la disciplines plu tecniches y desferëntes dl atletica lesiera. Coche vize presidënta y respunsabla dla sezion ginastica artistica ie unida liteda Rella Elena. Tl cunsëi iel nce Rungger Heidi, Lambacher Doris, Candelori Giampiero, Demetz Alexander, Frontull Hubert, Vian Lucia y Insam Verena. Danter i trainadëures iel Kostner Walter Delladio Denise y Runggaldier Monika. 

Al cunsëi y ai atlec ti augurons dut l bon y che i ebe inant mo truepa legrëza a lauré per l sport dl atletica.

04. Sep
2018

La surans Goffi inant dancà pra i Grand Prix

Nstadì, ai 02 de setëmber fovel sun l program l Grand Prix de Atletica lesiera do che i atlec à paussà ntan l'instà. L Grand Prix ie na sort de capiunat de atletica ulache la se trata de se davanië ponc aldò di resultac che n arjonj. Vëncer vënc l'atleta o atlet che ala fin dla sajon ie stat l plu cumplet, chël uel di che l muessa vester stat bon tla disciplines de sauté (distanzes longes o curtes), vester stat bon de tré sauc (saut aut y saut lonch), ma nce de tré massaries coche l pëis, l disch o la lanza.

L'atletes de Gherdëina, alenedes a Walter Kostner, se á inó batú a n boniscimo livel demustran coche bele ntan duta la sajon de avester al autëza dla concurënza. Ëiles à purtà al'Atletica Gherdëina Raiffeisen doi bedaies d'or, doves d'arjënt y una de bront fajon de bona prestazions nce sce n à messù garejé sota na gran jeta.

Tla categuria dla Sculees A, ie stata Goffi Chiara a zapé trëi iedesc sun l podest, vencian sibes tla garjeda tl smaché la lanza (33,66 m.), che nce tl saut tripl (10,75 m), ma ruvan nce al terzo post tl sauté i 80 m cun rëmes (13,13).

Tla medema categuria ie Jana Tomasini ruveda al 5. post tl smaché l disch y al 8. post tl sauté i 80 metri cun rëmes.

Pra la mutans categuria B ie Goffi Alessia ruveda al 2. post tl saut lonch (4,24 m), ma nce tl smaché l pëis (8,66 m). Ti 60 metri sprint iela da udëi iusta sota l podest al 4. post. Tla medema categuria á nce garejà Windegger Daiane (5.post ti 60 m ; 7. post tl saut lonch), Karbon Alice (cun n bon 4. post tl saut lonch y n  6. post ti 60 m), Ploner Sabrina ( 11.post ti 60 m, 12.post tl smaché l pëis y 15. post tl saut lonch) y Frontull Maria (13.post tl saut lonch y 14.post tl smaché l pëis).

Inant jirala la proscima ena, ai 07 y 08 de setëmber cun i Campionac talians assoluc ulache l se à cualificà doi atlec dl Atletica Gherdëina Raiffeisen, y plu avisa Alexander Demetz y Alex Verginer. De chësta garejedes, che unirà fates a Pescara, fajerons mo na analisa plu avisa che publicheron sun la homepage..

Per l'Atletica Gherdëina Raiffeisen
Stefan Planker

26. Jun
2018

Grand Prix te Gherdëina: Samuel Demetz vënc la garejeda di 2000 m

Nstadì iel unì metù a jì laterza garejeda dl capionat de atletica lesiera Grand Prix Ladurner 2018. I urganisadëures fova chëst’iede l‘Atletica Gherdëina Raiffeisen.

Coche uni ann, iel nce chëst’ann unì metù a jì te Gherdëina na garejeda de atletica lesiera per la categuries A y B di sculeies. La manifestazion ie stata ai 15 de juni, de vënderdi da sëira ulache la partezipazion fova purmpò bëndebo auta sce n pënsa che l fova propi l di ulache la scola finova via. La cundizions per la garejeda fova dldut adatedes cun surëdl ma nia massa ciaut, nce sce cun mpue de vënt de contra pra la garejedes de sauté.

Dal pont de ududa dla prestazion de nosc atlec iel da auzé ora la bona garejeda de Samuel Demetz ti 2000 metri. Samuel ie spezialist tl sauté distanzes plutosc longes y à bele chisc ultimi ani demustrà de vester pra i mieures de Südtirol te si categuria. Nsci iela nce stata a Santa Cristina. Te na garejeda dldut tatica ti iel stat do a si averser che à trat per feter duta la garejeda, canche al autëza di 200 metri dal travert al auzà si ritm ti jan dant al concurënt de Maran y l batan ala fin mpo de truep secunc. Samuel Demetz à nsci vënt cun n tëmp de 6,31,82 dan Rossi Paolo dl AS Meran 6,35,72 y Vianello Leonardo dla SAF Bolzano 7,22,18.

Truep autri podesc‘ ie garatei per l’atletes de Gherdëina. Publicon tlo la prima trëi posizions arjontes.

Da auzé ora iel nce Goffi Alessia che à venciù l saut aut cun na mesura de 1,43, ie ruveda segonda tl smaché l pëis (9,28m do Haller Linda de Passeier che à arjont i 9,60 m.) y terza ti 600 metri cun l tëmp de 1,57,05. Nce Chiara Goffi ie zapeda doi iedesc sun l scialir dl podest, un n iede ruvan segonda ti 80 metri cun rëmes ( 13,30 sec.) y l auter, nce tlo segonda, tl smache la lanza (38,93 m). Par l smaché la lanza à venciù Fischnaller Sarah trajan l record provinziel de categuria cun na mesura de 44,70 metri.

Na gran lauda ti je jita da pert dla Fidal al Atletica Gherdëina Raiffeisen per avëi metù a jì tan apuntin la garejeda. N rengraziamënt ti va a nosc presidënt Siegfried Runggaldier per se avëi cruzià de mëter a jì la garejeda, a duc i ulenteres che à judà ntëurite, a nosc trainadëures che cun pascion nsënia ju nosc atlec y ai atlec y ala atletes nstësc per la boniscima prestazions.

 

Per l’Atletica Gherdëina Raiffeisen 

Stefan Planker

07. Jun
2018

Allessia Goffi vënc la bedai d’or a Persenon y se cualifichea per i campionac talians de categuria

Nstadì, y plu avisa ai 2 y 3 de juni fovel sun l program dl atletica lesiera la garejedes che valova per la l titul provinziel dla proves multiples tla categuria sculees y sculeis B. Coche on bele abù ucajion de scrì plu iedesc, ie l’atletes y i atlec dl’Atletica Gherdëina Raiffeisen bele da truep ani che mëscëida pea pra i mieures dla provinzia y dla region y nce tla sajon 2018 ne n’iela nia autramënter. A Persenon y a Trënt àn propi te chësc ultim fin dl’ena inò demustrà l gran valor y la bona preparazion che dl’Atletica Gherdëina Raiffeisen ie bona de ti dé a si atlec. Defati ie Alessia Goffi stata bona de se fé valëi te tramedoi ucajions: la prima a Persenon ulache la se tratova de se bater per la bedaia d’or y l titul da campiunëssa provinziela cun l mesum de se cualifiché pra i campionac talians, cossa che ti ie garateda defin, a Trënt de se museré pra n meeting, for tla proves multiples cun na partezipazion de bën 79 atletes da duta la region. Mbën, nce tlo iela stata la mieura de dutes demustran cun si prestazions de vester a n livel dastramp aut. Una dla dificulteies dla proves multiples ie propi chëla de vester cumplec coche atlec. Per vester boni muessen demustré capaziteies deferëntes, sibes tl sauté (distanza asvelta y distanzes plu longes) che ti sauc (saut lonch o saut aut) y tl smaché la massaries (vortex, codla o pëis). La soma di ponc che vën cumpedei adum pra uni pestazion fej ora la tlassifica, daviadechël possen nce avëi vel atlet o atleta che nce sce la ie mpue plu dëibla te una o l’autra disciplina, possela purmpò se vëncer la garejedacomplessiva. Pra Alessia Goffi alincontra sautel tl uedl che la se bat te uni disciplina dla proves multiples per la mieura prestazions. Pra i sauc tëniela pea pra la mieures, avisa coche pra l smaché la massaries coche nce pra l sauté.

Tla categuria B iel da fé l triatlon, chël uel dì trëi disciplines che se giamieia juda da iede a iede. A Persenon mé per dì fovel da fé i 60 metri, l saut lonch y smaché l pëis, a Trënt messova l’atletes sauté i 600 metri, fé l saut lonch y smaché l vortex. Tlo à Alessia venciù l saut lonch, ie ruveda segonda ti 60 m sprint y segonda tl smaché l pëis. Ala fin iela ruveda prima cun 1909 ponc. La segonda ie stata Bramazza Federica dla SAF Bolzano cun 1830 ponc. Danter la 10 mieures iel nce al 8. post Karbon Alice cun 1648 ponc.

A Trënt à la portaculëures de Gherdëina Alessia Goffi venciù i 600 metri (tëmp de 1,51,94), l saut lonch (mesura de bën 4,55 metri) y segonda tl vortex (34,39 metri), batuda da si cumpania Jenegger Selina (36,93 metri) che sun 79 atletes ie ruveda complessivamënter al boniscimo 5.post.

Tla tlassifica finela pra la garejeda a Trënt à donca Alessia venciù cun 2100 ponc, dan Merighi Gloriadla Atletica Alto Garda e Ledro (1878 ponc) y Antolini Sara dla Atletica Tione cun 1846 ponc. Jenegger Selina ie ruveda 5. cun 1825 ponc.

Cun chisc resultac se à Alessia cualificà ai campionac talians de proves multiple te si categuria che sarà ai 22 de setëmber a Rimini.

N gran cumplimënt ti va a duta la atletes de Gherdëna che à fat pea y a Walter Kostner che se dà ju cun pascion y lezitënza ti stajan danieura daujin a nosta atletes.

 

Per l’Atletica Gherdëina Raiffeisen

Stefan Planker