ASV Atletica Gherdëina Raiffeisen ASD
ASV Atletica Gherdëina Raiffeisen ASD
ASV Atletica Gherdëina Raiffeisen ASD

News

11. Oct
2017

Bën 5 atlec dl Atletica Gherdëina Raiffeisen pra i campiunac talians de atletica lesiera a Cles tla Val di Non

Chëst ann ie i campionac talians de atletica lesiera per la categuries U16 unìi metui da jì dala provinzia ujina, tl Trentin y plu avisa a Cles tla Val di Non. Pra chësta garejeda se anconta i mieures dla categuria de duta la Talia y perchël iel na ucajion per se museré cun i cumpanies propi a livel naziunel. Per pudëi fé pea pra la garejedes muessen nce vester i mieures dla provinzia te chëla disciplina. I atlec de nosta provinzia che possa garejé vën crì ora dal trainadëur provinziel aldò di resutac arjonc ntan la sajon. L mieur o la mieura de uni garejeda raperjenta depona la provinzia, y garejà vëniel a scuadres.

Na gran sodisfazion à l trainadëur dl Atletica Gherdëina Raiffeisen, Walter Kostner, pudù se to tl mumënt che la lista di cunvuchei ie unida ufizialiseda: bën 5 atlec de Gherdëina fovel da udëi sun lista y sambën duc te disciplines desferëntes. Fat pea a Cles à Martina Falchetti, Hanna Insam, Maria Grazia Candeloro, Chiara Goffi y Samuel Demetz. N numer tan aut de partezipazion de Gherdëina ne n fovel mei stat.

Bele sun la papier savoven nce che l fossa stat dastram rie a se fé valëi, purmpò iel sautà ora vel resultat drët mpurtant. Bele pudëi fé pea ie un di majeri traverc dla sajon per uni atlet, daviadechël ti fajons i cumplimënc a duta la partezipantes y partezipanc nce sce te vel vcajo ie la prestazion stata sota si potenzial. 

L mieur resutat dal pont de ududa dl Atletica Gherdëina Raiffeisen ie stat l bon 5. post unì arjont da Martina Falchetti ti 1000 metri. Martina  ie sauteda la distanza de 1 km te 3.04.15 menuc. Da auzé ora iel nce l 13. ejm post de Chiara Goffi tl smaché la lanza. Che ie juleda  33,96 metri lonc. N 17. ejm post ti ie garatà a Samuel Demetz ti 2000 metri. I 2 km ie unìi sautei da Samuel te 6,13,47 menuc. L 20 ejm post ti ie jit à a Hanna Insam tl saut aut cun 1,50 m, y l 22. ejm post a Maria Grazia Candeloro tl smaché l disch che ie julà 23,15 metri lonc.

Cun chësta garejeda ie la sajon de atletica lesiera tan che finida via, na sajon che ti à inò purtà de bela sodisfazions ala liadl atletica y ai trainadëures. 

 

Per l’Atletica Gherdëina Raiffeisen

Stefan Planker

05. Oct
2017

Senteda generela

Ai 7 de november uniral fat la senteda generela de l'Atletica Gherdëina dala 20:00 dal campo de Mulin da Coi

11. Sep
2017

Ultima garejedes per i atlec dl atletica lersiera cun de biei resultac, dantaldut tl smaché la lanza

Te chëst’ultima enes à n valgun  atlec y atletes dl’Atletica Gherdëina Raiffeisen fat pea pra garejedes che valova per l Grand Prix 2017y pra manifestazions de curnisc. 

Do che n valgun atlec ie stac a San Benedetto del Tronto a fé si alenamënc da d’instà, à La lia dl Atletica Gherdëina Raiffeisen fat pea a Bruneck al Grand Prix che valova per l campionat provinziel cun de boniscimi resultac. Da auzé ora iel l prim post de Goffi Chiara tl smaché la lanza. La mesura ie una dla miures 20 dla Talia y chësc lascia nce speré per l daunì dla jëuna de Urtijëi. N terzo post ti ie pona nce garà a Chiara tl saut aut. Cun na mesura de 1,46 m iela ruveda terza y à pudù pië do la bedaia de bront. A Bruneck ti ala nce dassënn butà a Selina Jenegger tl smaché la codla. Tla categuria dla mutans B defati mpede la lanza vëniel smacheda na codla. Nce ëila à venciù tla categuria cun na mesura de 33,82 metri. Tal categuria di assoluc che à pudù garejé pea coche manifestazion de curnisc iel da auzé ora l record persunel de Verginer Alex nce tlo tl smaché la lanza. Alex ie stat bon dla smaché bën 51,31 metri lonc, na mesura mpurtanta sce penseda tl contest dl decathlon, disciplina ulache l ie danter i mieures dla Talia.

 

Verginer y Demetz pra i campionac austriacs tl decathlon

Ala fin de agost fovel sun l program i campionac austriacs  tla proves multiples. Pra chësta garejedes ova nosc atlec pudù fé pea, do che la FIDAL Federazion taliana de atletica lesiera ova dat l’autorisazion, coche garejedes ora dla concurënza. Cun 6616 ponc ie Verginer ruvà al curato post te graduatoria. La prestazion ie dessegur nteressanta nce sce pra vel garejeda ala mpue sciacà y n ëssa pudù se aspité velch deplù. Si record persunel defati ie de 6848 ponc arjonc pra i campionac talians ulache dan n valgun mënsc fovel ruvà al terzo post. Cun chisc ponc fossel stat l miur. Defati l campion austriach de decathlon, Severin Chum de Graz à arjont 6816 ponc. Drët bon fova nce pià via Alexander Demetz che ova bele demustrà na bona forma ntan l’instà, ma purtruep bele inò se àl fat mel ntan la garejeda, chëst iede pra chëla de fé l saut cun l fust (asta), tant che l ne n’à nia plu fé inant ll rest dla garejedes. Per ntant ti vala inò miec y fej nce inant i alenamënc coche preudui dal programm. 

Inant jirala cun la finela dl Grand Prix pra chëi che se à cualificà n valguna atletes dl’Atletica Gherdëina Raiffeisen. Per Alexander Demetz y Alex Verginer ie la sajon 2017 dal pont de ududa agonistich plu o manco fineda via.

Per l’Atletica Gherdëina Raiffeisen

Stefan Planker

16. Jun
2017

Chiara Goffi doi iedesc campiunëssa provinziela de atletica lesiera

Truepes ie states la lies de atletica che à tëut pert ai campiunac che valova per l titul provinziel de atletica lesiera 2017 y treupes ie stac i atlec y atletes che à garejà  ai 10 y 11 de juni tl bel ciamp dal sport Mulin da Coi a Santa Cristina. La garejedes, de ndut 51, fova unides metudes a jì dal Atletica Gherdëina Raiffeisen n cunlaurazion cun la Fidal.

Cun n bel tëmp, a strufes povester nce massa ciaut, ma purmpò n generel cun de bona cundizions à duc i atlec y atletes de Südtirol pudù garejé l ultim fin dl’ena te Gherdëina pra na manifestazion che à dut ntëur butà y che à nce purtà de boniscimi resultac per l’Atletica Gherdëina Raiffeisen. De ndut iel sautà ora per nosta lia bën 4 titui provinziei, 3 bedaies d’arjënt y una de bront.

Bën doves ie states l’atletes de nosta valeda che ie ruvedes doi iedesc sun l podest: Chiara Goffi cun bën doi iedesc or, un tl saut aut (1,46 m) y un tl smaché la lanza (39,41 m) y Maria Grazia Candelori, or tl smaché l disch (21,79 m) y n arjënt ti 80 m cun rëmes (13,47 secunc). Oradechël à pudù pië do la bedaia d’or nce Martina Falchetti ti 1000 metri cun n boniscimo tëmp de 3,13,31. Sun l segondo scialier dl podest ie nce zepei su Samuel Demetz ti 2000 metri (6,59,06 min) tla categuria di sculeies A y Jenegger Selina tl smaché la codla (31,62 m) tla categuria dla sculees B.  La bedaia de bront per l’Atletica Gherdëina Raiffeisen ti ie mo jita a Tomasini Jana nce ëila tl smaché la codla tla categuria dla sculees B (30,30 m).

La mieura lies de atletica ie statates chëst ann l SV Lana y la SAB Bolzano cun tramedoves 9 bedaies d’arjënt. Dal pont de ududa tecnich ie stata la stafëta svedeja (100 m + 200 m + 300 m + 400 m) dla categuria dla sculees A dla sozietà dla SAB de Bulsan a se fé na prestazion particularmënter de prestij. Defati à chësta mutans arjont l record provinziel cun 2,27,49 miuran l tëmp de plu de un n secunt. N cont dla Atletica Gherdëina Raiffeisen alincontra ie dessegur la mesura arjonta da Chiara Goffi tl smaché la lanzia la gran sensazion. Al mumënt iel la jëuna de Urtijëi cun si mesura da udëi danter la cuinta mieures dla Talia te si categuria.

A duta la atletes y a duc i atlec ti fajons nosc mieur auguresc per chisc biei resultac y al presidënt dl atletica Siegfried Runggaldier y si team ti fajons na gran lauda per la bona organisazion de duta la manifestazion. Tulon l’ucajion per rengrazië duc chëi che à judà pea pra l’urganisazion, i genitoresc, l speacker Luis Mahlknecht y al chemun de Santa Cristina cun l’assessëura Marika Schrott per avëi metù a disposizion l bel ciamp dal sport Mulin da Coi.

 

Per l’Atletica Gherdëina Raiffeisen 

Stefan Planker

30. May
2017

Gran sodisfazion per Alex Verginer: bedaia de bront pra i campiunac talians assoluc de atletica lesiera

L majer suzes che ie unì arjont nchin sën sun pista da pert dl’Atletica Gherdëina Raiffeisen ie dessegur chël arjont da Alex Verginer nstadì a Lana pra i campiunac talians assoluc tl decathlon. Danter i gran suzesc de nosta lia iel da cumpedù su la garejeda di campiunac mundiei de sauté da mont su venciuda da Hugo Senoner tla categuria sëura 45 ani (M45) dan truep ani y l titul Talian de Janina Schenk tla proves multiples tl 2007 tla categuria alieves, ma tla categuria di assoluc iel l prim iede che udon n atlet che ie danter i mieures dla Talia pra la garejedes sun pista.

Alex Verginer fova bele chisc ultimi ani da udëi danter i mieures tl decathlon tla categuria U23, ma l gran saut sun l podest pra i assoluc ti ie garatà i 27 y 28 de mei 2017 a Lana canche l ie stat bon de se bater cun i mieures ruvan per mé puec ponc al terzo post y canche cun n pue de fertuna iel ëssel pudù pië do la bedaia d’arjënt che fova tan che al col dan l’ultima garejeda. L decathlon ie pu defati na garejeda ulache i atlec muessa te doi dis fé 10 garejedes y aldò dla mesura o tëmp che i atlec arjonj ti vëniel dat ntan de ponc sun la basa de na tabela nternaziunela. Nchin ala nona garejeda fova Verginer defati mo segondo, ma pra l’ultima garejeda ulache l ie da sauté 1500 metri,  ne se tratovela nia mé de sauté, sauté y sauté, ma nce de lauré de tatica ajache l savova che al terzo y quarto post fovel atlec dastramp stersc te chësta disciplina y mplu fova Alex ntan l’ena amalà cun mel de col y per n valgun dis sënza alenamënt. Cun gran artenienza y ulentà iel purmpò stat bon de miuré si prestazion persunela ti 1500 m y de purté a cësa la beliscima bedaia de bront salvan  nsci na luegia sun l podest, che ti porta de gran sodisfazions a d’ël nstëss, al‘Atletica Gherdëina Raiffeisen y al trainadëur Walter Kostner, bedaia coche frut de gran sacrifizies.

Alex ie defati n atlet do la rata bëndebo complet cun n potenzial de miuramënt dantaldut pra l smaché la massaries, ma nce pra l saut cun l fust y tl saut lonch. Pra chësta sortes de cumpetizions ne bastel nia mé de avëi n bon fisich anjenià ca apuntin, ma nce truepa tecnica, na gran reazion, n bon fla y na gran cunzentrazion.  Pra l decathlon muessen nce for inò vester anjeniei y se cunzentré da nuef, unfat coche la garejedes dant ie jites. Sce pra una na garejeda scechela, muessen pra chëla do l avëi desmincià, sce la à butà muessen vester boni de se ciarië da nuef y nia lascé dò la cunzentrazion. L deacthlon vën defati rateda coche la garejeda plu cumpleta de duta la garejedes y la preparazion muessa unida anjenieda ca profescionalmënter de uni vieres.

Per cie che reverda i singui resultac  iel da auzé ora che Alex à fat de ndut 6848 ponc. Venciù a Zanatta Jacopo cun 7327 ponc dan Paoluzzi Roberto cun 6894 ponc. Al cuarto post destacà de mé 27 ponc ie Asamoah Stephen Kobena cun 6821 ponc. Pra la garejedes de Lana dlongia Maran à Verginer fat si record persunel sibes pra la cumpëida di ponc n generel che nce tla disciplines dl saut lonch, tl smaché l pëis, tl smaché l disch y ti 1500 metri. 

Nsci i resultac plu per menut: 100m: 11,54 (744 ponc); 400 m: 50,71(782 ponc); 1500 m: 4,35,66 (708 ponc); 110 m cun rëmes: 15,97 (736 ponc); saut aut: 2,00m (803 ponc); saut cun l fust: 4,00 m (617 ponc); saut lonch: 6,74 m (753 ponc); smaché l pëis (11,36 (568 ponc); smaché l disch: 35,95 m (583 ponc); smaché la lanza: 47,69 m (554 ponc).

A Alex Verginer ti augurons mo truepa sodisfazions per l daunì y speron che tres chësc resultat vëniel numinà dala Federazion taliana de atletica lesiera a fé pea pra la Copa Europa che chëst ann unirà fata a Monzon tla Spagna te feter n mëns.

 

Per l’Atletica Gherdëina Raiffeisen 

Stefan Planker

02. May
2017

Alex Verginer: Campion regiunel de decathlon

La garejedes de atletica lesiera ie chëst ann piedes via cun l drë pe per i atlec dl Atletica Raiffeisen Gherdëina. Sun l program de auril fovel ai 22 y 23 i campiunac regiunei de proves multiples, na manifestazion sportiva pra chëla che i atlec partezipanc muessa fé pea plu garejedes aldò dla categuria y pra chëles che n giata pra uni singula garejeda ponc n relazion ala prestazion fata. La cumpëida di ponc de uni garejeda vela per la tlassifica generela.

Per l’Atletica Gherdëina fovel Alex Verginer che à garejà tla categuria assoluta y, coche bele l’ann passà nes àl demustrà de vester l miëur tla Region Trentino Südtirol arjunjan de ndut 6593 ponc. Chësta prestazion ie dastramp mpurtanta ajache l ie si record persunel y ie una dla mieura mesures al mumënt tla Talia. Che Alex sibe n atlet de livel naziunel ovel bele demustrà l’ann passà y cun si ponc fovel feter uni iede ti 10 mieures a livel naziunel. Garejà iel unì a Persenon pra cundizions atmosferiches plutosc bones, nce sce a strufes mpue massa da vënt y i resultac dal pont de ududa dl Atletica Gherdëina Raiffeisen  lascia speré dreët bën per i campionac talians assoluc che chëst ann unirà fac de mei a Lana. A persenon ne n‘ à Verginer nia mé miurà si resultat finel, ma nce fat trëi recorc persunei y plu avisa ti 110 metri cun rëmes, tl disch y pra l saut cun l fust.

Nsci i resultac de Verginer: 100 m.: 11,47; 400 m.: 51,71; 1500 m.: 4,49,72; 110m cun rëmes: 15,80; saut aut: 1,98; saut cun l fust: 4,10; Saut lonch: 6,56; smaché l pëis: 11,16 m.; smaché l disch: 35,05m; smaché la lanza: 41,21 m.

Pra la medema manifestazion fovel sun l program nce i campionac Regiunei dl eptahlon (set disciplines) per la categuria junionr, promesse y senior ulache Perathoner Linda ie ruveda al bon 4. post cun 3392 ponc;  tl penthatholn (cin disciplines), ulache udon al 6.post Goffi Chiara 3098, al 7.post Insam Hannah 3022, al 12. Post Candelori Maria Grazia cun 2548 ponc, al 19. post Prathoner Linda 2105 ponc y tl tetrathlon (trëi disciplines), al bon 4.post Goffi Alessia cun 2215 ponc, al 7.post Tomasini Jana cun 2105 ponc.

 

Per L'Atletica Gherdëina Raiffeisen
Stefan Planker

27. Sep
2016

Goffi Chiara campiunëssa regiunela tl smaché l pëis

pra i campiunac regiunei a Maran y Arco porta l’Atletica Gherdëina Raiffeisen a cësa na bedaia d’or, una d’arjënt y doves de bront
Treupes ie inò  stac i resultac de prestige da pert di atlec de Gherdëina pra i campinac regiunei dla categuries sculeies A y B metui a jì l prim di a Maran y l segondo di a Arco tl Trentin.
Da auzé ora te na maniera particulera iel dessegur la boniscima prestazions de Goffi Chiara de Urtijëi che ie stata bona de zapé doi iedesc sun l podest. Dantaldut  pra l smaché l pëis iela stata bona de se davanië l titul regiunel demiustran de vester tl Trentino Südtirol, tla categuria sculees B, la miëura. L beliscimo titul iela stata bona de arjonjer  smacan l pëis a na destanza de 11,12 metri canche la segonda dl G.S. Trilacum dl Trentin,  Arianna Agostini  à smacà l pëis de 2 kg a 10,73 metri. La terza ie stata Fischnaller Sarah de Bulsan cun 10,10. Chiara ie nce stata bona de pië do la bedaia che valova coche vize campiunëssa dla Region y plu avisa te n autra disciplina ulache la ie chisc ani for stata pra la miëures: tl smaché la codla. La pitla codla che à n pëis de 200 gr. ie propedeutica a smaché la lanza che ie preududa tla categuries plu autes. Goffi Chiara ie stata bona de smaché bën 51,05 metri lonc canche la mieura ie chëst iede stata Fischnaller Sarah de Bulsan. La campiunëssa regiunela alincontra de Chiara à smacà 53,93 metri, canche la terza ie ruveda a 39,02 metri.  
N beliscimo terzo post regiunel ti ie jit a Demetz Samuel ti 1000 metri tla categuria sculeies B. Samuel ie plu suvënz stat bon de purté resultac de n livel dastramp aut tl sauté destanzes che vën cunscideres coche mesanes (mezzofondo) y si forma oven bele udù plu iedesc ntan la garejedes tres i luesc che vën metudes a jì ora per i paejes de  Südtirol. Sterch se àl demustrà de vester particulermënter nce sun pista. Defati iel stat bon cun si 3,06,83 de se davanië n terzo post segur do Luca Devigli dl Atletica Valle di Cembra (3,02,26) y Valduga Simone dl US Quercia Trentingrana de Rurëi (3,05,83).
Na bela bedaia de bront ti ie nce jita a Soppelsa Diego ti 300 metri cun rëmes tla categuria sculeies A. Cun si 45,28 al purtà sun l podest i culëures dl Atletica Gherdëina Raiffeisen dlongia Riccardi Mirko dl GS Trilacum che ie campion regiunel (43,52) y Campidelli Jordan dl Atletica Tione (43,85). Diego ie nce ruvà al 5. post pra l sauté i 100 m cun rëmes cun l tëmp de 16,41. L miëur ies tat nce tlo Riccardi Mirko (15,50).
Iust nia sun l podest y cun na bedaia de lën à messù se ancuntenté Lorena Ploner de Sëlva tl sauté i 80 metri cun rëmes pra la sculees A. Cun 13,36 iela ruveda cuarta. La miëura ie stata Gamper Maia de Maran (12,55). Lorena ie nce da udëi al 8. post tla disciplina de smaché l pëis de 3 kg. La miëura à smacà 11,32, Lorena alincontra 7,56 metri.
Danter i resultac iel mo da auzé ora l 8.post de Falchetti Martina ti 1000 metri (3,28,57), l 12. post de Tomasini Jana tl smaché la codla (27,92) y l 13. Post de Tomasini Jana tl saut aut (1,15).
N bel gran cumplimënt ti va a duta la atletes y atlec, ma nce ai alenadëures y a dut l team dl Atletica Gherdëina Raiffeisen per chisc bon resultac.


Per l’Atletica Gherdëina Raiffeisen
Stefan Planker